Cherry Audio MINIVERSE
Ye nueche, y güei toca pasala programando una llínia de baxu con esti sinte tan espectacular, el Miniverse de Cherry Audio.
Soi cérrimu d'esta clas de soníu tipo Moog. Tengo por vezu enfotame siempres nestos sintes a la gueta de soníos orgánicos, caldios y analóxicos, pasando hores y hores de trabayu nel lowend, programando llínies de baxu. Y ye qu'estos sintetizadores analóxicos son enforma adictivos.
Dicen qu'el Minimoog Model D, asoleyau nel añu 1971, foi'l güelu de tolos sintetizadores. Y Miniverse ye la emulación que mos ufre Cherry Audio. Miniverse ye una emulación qu'amás d'ufrir los mesmos controles y funciones que l'orixinal, añade dalguna otra, como el mou polifónico de 16 voces o soporte MPE (dalgo perimportante). Asina qu'amás de programar eses llinies analóxiques de siempres, col mou polifónico sedrá perinteresante programar dellos acordes, ver los finxos que podemos algamar con eses 16 voces y prebar como queden dientro l'entornu d'una mestura.
La GUI ye ablucante, non hai alderique dalu. Compuesta por un panel de controles llimpiu y cenciellu como l'orixinal. Pero lo más prestoso d'esti sintetizador, creo poder dicilo con criteriu fitu, ye'l soníu de so. Y ye que sentir esti sinte n'aición produz verdaderu plasmu !
Asina que depués d'enllazar MIniverse a un controlador AKAI MPK Mini MK 2 entamamos a trabayar nel lowend, programando dos instancies de Miniverse y una de Sylenth1. Un de los Miniverse amuésase dalgo xabaz, y siéntense delles resonancies, dalgo cafiantes, alrodiu de los 100 hz. Poro intentamos controlar esi baxu apurriendo dalgo d'Eq dinámica. Pa esta xera emplegamos el Eq Nova de Tokyo Dawn Records. Configuramos el threshold pa emburriar unos 2 decibelios. Darreu damos-y daqué puxu col Abbey Road RS124 Vintage Tube Compressor de Waves y ... a esnalar !
No que finca'l soníu gordu, caldiu y analóxicu que guetamos n'esta triba sintetizadores, creo que Miniverse cumple perfeutamente y ye una ferramienta capaz d'algamar esi soníu pol que toos naguamos. De fechu, pué considerarse qu'agora con Miniverse los productores d'electrónica tenemos una auténtica ayalga énte nos. Podéis sentilo nel videu que vos apurrimos con esti post.
A ver que nos sal esta vegada !
Waves Abbey Road RS124 Vintage Compressor
Comentarios
Publicar un comentario